Entaifer curt temp hai dà trais terratrembels. In en Haiti, l'auter en Chile ed il terz en Taiwan. Il terratrembel en Chile ha stuschà l'axa da la terra, quai che fa vegnir ils dis pli curts. Il Minisguard declera co che quai è pussaivel. L'ultim mais n'han betg mo ils sportists grischuns fatg medaglias. Era las vatgas grischunas han survegnì medaglias. Nus mussain daco ch'ina vatga lumneziana è ida cun la plima ad in campiunadi internaziunal en l'Italia. Plinavant avain nus visità Angela e Marco Capaul da Lumbrein, els dus ves'ins actualmain en in spot da reclama.  

En sasez fa nossa terra anc adina il medem sco avant il terratrembel en Chile. Ella sa volva trasora enturn sa sezza e fa en il medem mument era il viadi enturn il sulegl. Dapi il terratrembel en Chile è insatge dentant auter. Nossa terra sa volva ussa numnadamain pli spert enturn sa sezza ed ils dis vegnan in zichel pli curts. Co è quai pussaivel?

L'ultim mais n'han betg mo ils sportists grischuns fatg medaglias. Era las vatgas grischunas han survegnì medaglias. Ad in campiunadi internaziunal a Verona en l'Italia èsi vegnì premià las pli bellas vatgas da l'Europa. E la vatga Calanda da Morissen è la pli bella vatga giuvna da l'Europa. Nus avain visità ella e ses possessur a Morissen ed avain guardà daco che la vatga lumneziana è ida cun la plima en l'Italia.

Vus avais segir guardà quest'emna televisiun. Forsa avais era vis la reclama da chaschiel nua ch'in buob va cun ina magnucca chaschiel davent da l'alp giu en il vitg ed entaupa sin viadi ina mattatscha. Quai èn ils fragliuns Marco ed Angela Capaul da Lumbrein. La stad passada han els lavurà trais dis per quest spot da reclama che cuzza mo 35 secundas. Il Minisguard ha visità ils fragliuns a Lumbrein.