Tschairar skis da passlung

Tschairar skis u unscher skis è impurtant. Cunzunt tar ils skis da passlung. Pertge entant ch’i va pli u main da sez d’ir cun ils skis alpins dal culm giu, dovri tar il passlung l’atgna forza per vegnir enavant. Uschia èsi meglier sch’il ski glischna bain sur la naiv. Unscher skis n’è dentant nagin striegn. L’expert Ralph Joos ans declera co ch’i va.

Sco quai che Ralph Joos, il manader da la fatschenta Ralpf Joos Top Sport ha ditg, dettia quai adina dapli uffants che fetschian passlung. El haja vendì quest enviern dapli skis da passlung ch'uschiglio. Probabel saja quai l’effect dal success da Dario Cologna e da ses collegas dal team naziunal da passlung.

Preparaziun
Avant che cumenzar ha Ralph Joos preparà tut quai ch’el dovra e fermà il ski sin in indriz spezial. Igl è impurtant ch’il ski saja fermà e na sa ruschna nagliur. Cun quest sistem vegn il ski fermà vi da la liadira.

La merda sto davent
Avant che metter lasura insatge, èsi da nettegiar e far davent la merda. Perquai dovra Ralph Joos dus differents barschuns. In è pli grop e l’auter è pli fin. Sch’ins fa quai a chasa, han ins per il pli mo in barschun che ha ina part groppa ed ina fina.

Cun il barschun vegn la cuvrida dal ski schubregiada. Quai vul dir che la tschaira ch’è anc sin la cuvrida dal ski ed en las poras, vegn schubregiada davent dal tut.

Impurtant èsi ch’ins schubregia cun il barschun da davant (piz dal ski) enavos. E mo en questa direcziun. Uschiglio fan ins donn a la cuvrida dal ski. Quai èsi da repeter pliras giadas ed ins dastga smatgar il barschun vaira ferm.

La tschaira per stuschar davent l’aua
Ussa èsi da stgaudar il fier. Quai po esser in fier vegl da far or cun il fier vestgadira. Ma betg prender quel da la mamma! Quella n’avess nagin plaschair. Ralph Joos ha in fier spezial. Tar quel po el regular exact la temperatura. Quai è numnadamain impurtant. Mintga sort da tschaira dovra in pau in’autra temperatura.

La temperatura è inditgada sin il pac da mintga sort da tschaira. Sch’ins n’ha nagin fier ch’inditgescha la temperatura, lura èsi d’empruvar ora. Sche la tschaira svapurescha empè da cular sin il ski è la temperatura memia auta ed igl è da sbassar  la temperatura, fin che quai na capita betg pli.

Tge tschaira ch’i dovra, dependa da la temperatura da la naiv. Il pli usità èn las trais sorts tschaira sin la foto dasperas. Tut tenor marca po quai variar in zichel.

Cura che quai è fatg, èsi da prender il fier ed ir cun quel da davant enavos sur il ski. Quai èsi da far pliras giada, enfin che la tschaira è repartida guliv sin il ski. La tschaira sto numnadamain puspè emplenir tut las poras e sgriffels ch’i dat.

Quai ch’è da memia sto davent
Cun ils dus utensils dasperas pon ins trair davent la tschaira ch’è da memia. La cuverta dal ski sto numnadamain esser fitg glischa.

L'emprim èsi da far ora la tschaira ch’è da memia da la crena u crennas (quai dependa dal ski).

Lura sto la tschaira svanir dals urs.

E la finala èsi da far davent la tschaira da la cuvrida dal ski. Era quai capita dal piz dal ski enavos.

Per finir èsi lura anc da nettegiar il ski ed alura è quel pront per la loipa.

Tschaira liquida
Per tgi che n’ha betg peda e vul tschairar in pau pli simpel ils skis datti tschaira liquida.

Avant ch’ins po dentant metter si quella tschaira, èsi natiralmain era da schubregiar il ski. Tuttina sco declerà sura.

La tschaira liquida pon ins lura dentant metter directamain sin il ski cun la spungia sin la stgatla.

Auter che cun la tschaira normala è quai lura gia tut quai ch’igl è da far ed ins po gist ir sin la loipa cun ils skis.

L’urden ch’i dovra
Ussa ch’ils pass per unscher ils skis èn clers, manca mo anc l’urden. Ralph Joos ha mess ensemen l’urden ch’i dovra.

• In barschun
• La tschaira (per las differentas temperaturas da naiv datti mintgamai in'autra sort)
• L’utensil per far ora la crenna dals skis
• L’utensil per far davent la tschaira
• La tschaira liquida (qua datti mo ina sort per tut las temperaturas da naiv)