Tge tip da pel avais vus?
Pel tut cotschna, che fa mal e sa paletscha? Quai na sto betg esser. Faschai il test e chattai ora, co che vus as pudais proteger.
Enconuschais vus quai:
Vus stuais metter si trasor crema da sulegl per che vus na survegnias betg in'arsentada, e voss'amia po star uras en il sulegl e na vegn insumma betg cotschna.
Schon in pau malgist! Dentant pertge è quai uschia?
Quant sulegl che vos corp cumporta, ha da far cun vossa pel, u meglier ditg cun il tip da pel che vus avais.
Tip 1:
Pel fitg clera, bleras lentignas, chavels blond clers ubain cotschnents
I va fitg ditg enfin che vus essas ina giada brins. Per betg survegnir in'arsentada dal sulegl stuais vus as proteger fitg bain.
Il meglier è, sche vus unschais en ina crema da sulegl cun il factur da protecziun da 50 e sche vus na stais betg memia ditg en il sulegl.
Tip 2:
Pel clera, pacas ubain insumma naginas lentignas, chavels blonds
Era vossa pel è sensibla. Per as proteger bain dal sulegl duvrais vus minimum ina crema cun il factur 40.
Tip 3:
Pel brin clera, chavels blond stgirs
Vus na survegnis betg uschè spert in'arsentada dal sulegl. Per pudair giudair ditg il sulegl stuais dentant era vus unscher en ina crema da sulegl. Il meglier ina cun in factur 30.
Tip 4:
Pel brina, chavels brins u nairs
Entant ch'auters èn anc adina sblatgs u han gia da ditg in'arsentada da la pel, essas vus schon brins. Dentant era vossa pel dovra protecziun. Cun ina crema da sulegl cun il factur 20 pudais vus giudair il sulegl senza problems.
Tuttina tge tip da pel che vus avais. In'arsentada dal sulegl pon tuts survegnir!
Daco datti arsentadas dal sulegl? Il Minisguard dals 03-07-2010 declera...