Scolina bilingua a Cuira sin ballantscha

Cun la fin da l'onn da scola va l'istorgia da la scolina rumantscha a Cuira a fin. La raschun è la situaziun finanziala da la Lia Rumantscha e la nova cunvegna da prestaziuns cun il chantun e la confederaziun. L'alternativa fiss stada ina scolina bilingua, ina purschida da la citad da Cuira. Il cussegl da la citad ha dentant decidì da sistir il project.

La Lia Rumantscha na po betg pli finanziar la scolina rumantscha a Cuira. Per l’ina manchian ils daners e per l’autra na vegnia questa purschida era betg pretendida en la cunvegna da prestaziun cun il chantun e la confederaziun. Uschia ha la Lia Rumantscha orientà.

Ina soluziun fiss il project da la citad da Cuira d’ina scolina bilingua rumantsch-tudestga. Mo quest project è vegnì sistì dal cussegl da la citad. La raschun persuenter èn era qua, ils daners che mancan. La Lia Rumantscha è fitg trumpada da questa proposta. Quai ha il manader da furmaziun da la Lia rumantscha, Martin Mathiuet ditg al Radio Rumantsch. Dapi onns hajan els contractà cun la citad e sperà ch'i dettia ina soluziun.

L'ultim pled en il chapitel ha dentant il cussegl communal da Cuira. El decida ils 28 da schaner davart la fatschenta. La Lia Rumantscha da sia vart spera ussa ch'il cussegl communal sa decidia la finala tuttina per ina scolina rumantsch-tudestga. S’engaschar per la scolina bilingua s’engascha era l'Uniun Scolina Rumantscha da Cuira.