Producziun dal Minisguard
Questa stad emetta la Televisiun Rumantscha mintga dumengia in’emissiun d’infurmaziun per vus uffants cun il num Minisguard. Mo tge capita tut enfin che l’emissiun è da vesair en la televisiun? Simsalabim ha guardà sur ils givels dal team che producescha il Minisguard.
- Carin, la producenta discutescha cun il team ils temas per il proxim Minisguard.
La lavur per ina emissiun cumenza cun ina sesida. Ma cuntrari al pled “sesida” fa il team la sesida en pe. La sesida vegn manada d’ina producenta u d’in producent. En noss cas è quai Carin. Ella discutescha cun las redacturas ed ils redacturs davart temas che vegnan en dumonda per l’emissiun. Ella reparta lura er las lavurs e procura ch’i dat la finala era in Minisguard.
- Claudio ha da far ina contribuziun che mussa co in pulschain daventa ina giaglina.
Claudio è redactur. El ha survegnì l’incumbensa da filmar co ch’in pulschain crescha e daventa ina giaglina.
- Claudio fa retschertgas.
Sco emprim hai num da far retschertgas. Quellas vegnan per il pli fatgas per telefon. La dumonda è nua pon ins filmar pulschains? Nua datti da quels ch’èn gist naschids? Claudio chatta in lieu per ir a filmar.
E lura hai num ir a filmar ils pulschains. Quella giada hai schizunt gì num da trair en in vestgì tut spezial. Quai pervi da la igiena ch’i dovra en ina stalla cun tants pulschains. L’um da camera, il Colin, guarda per la dretga glisch e ch’il pulschain saja en il maletg.
- Claudio, Jonas e Colin vid filmar il pulschain.
- Jonas e sia sora Daria, lur geniturs han la farma da giaglinas.
- Visiunar il material da film...
Arrivà a Cuira en la chasa RTR, hai num guardar il material da film e far ponderaziuns tge che vegn duvrà e co las sequenzas duain vegnir tagliadas.
- Rebcca taglia la contribuziun per il Minisguard
Per tagliar la contribuziun dovra Claudio l’agid da Rebecca. Ella è ina da las collavuraturas che taglia las contribuziuns per la televisiun. Ensemen taglian els la contribuziun e preparan quella uschia, ch’ella po vegnir emessa.
- Carin guarda la contribuziun che Claudio ha fatg.
Mo avant ha anc la producenta da guardar la contribuziun. Pir cura che Carin è cuntenta cun la contribuziun è quella era finida e pronta per la il Minisguard. Quella giada è tut stà en urden e Claudio n’ha stuì far naginas midadas pli.
- Armon fa emprovas da moderar en il studio da la televisiun.
Dumengia avantmezdi èsi lura uschè lunsch. Tuts èn semtgads en il studio da la Televisiun Rumantscha a Cuira. Armon, il moderatur ha tratg en sia pli bella chamischa e stat davant ina paraid verda. In pau gnervus, ma quai è er l’emprima giada ch’il Minisguard vegn registrà
- Ingo (dretg) è l'um da camera che guarda che Armon è en la dretga glisch.
L’um da camera, che ha num Ingo, curra dad in chantun en l’auter per guardar che tut è drizzà en endretg. Fitness na sto el sco quai ch’i para betg far. Uschè bleras giadas ch’el e currì da stgala si e giu per drizzar las chazzolas tanscha quai per l’entir'emna.
- Carin guarda che tut saja en urden.
En la reschia – il lieu nua che tut ils maletgs ed il tun vegnan registrads – sesan trais persunas. Tar la registraziun dovri sa chapescha puspè la producenta Carin. Ella ha il commando e guarda che tut saja bun.
- En la reschia: Enver, Roman e Carin (da sanester).
Dasperas sesa Roman. El è responsabel ch’ils dretgs maletgs sajan da vesair davos Armon. La paraid verda n’è sa chapescha betg da vesair. Quai è in tric che vegn adina puspè duvrà en la televisiun ed il film. Roman procura pia, ch’il verd vegn remplazzà cun in auter maletg. En noss cas è quai il decor dal Minisguard.
Enver è la terza persuna che sa chatta en la reschia. El guarda ch’il tun saja bun e ch’ins auda era tge che Armon raquinta.
- Cumplaina concentraziun: las registraziuns cumenzan.
Lura cumenzi. Tuts èn concentrads. Carin dat il cumond da cumenzar. Il signet cumpara e suenter è Armon londervi. El fa bainvegni a las aspectaturas ed als aspectaturs. Mo adina na funcziuna betg tut sco planisà. Uschia datti magari pausas perquai ch’i dovra midadas vid la tecnica u ch’il moderatur sa stgarpitscha sur ils pleds e sto anc ina giada cumenzar. Damai ch’i n’è betg ina emissiun che vegn emessa direct n’è quai lura er betg in problem.
Suenter che tut è registrà èsi mo anc da far las correcturas ch’i dovra e da semtgar l’emissiun, per ch’ella possia vegnir emessa il suentermezdi da las 17:15.
Bun divertiment!
