Nus avain dumandà co il frar grond da Pauli ha num. Cun la dretga resposta MAX han Carmen Solèr da Savognin e Simon Jehli da Versomi gudagnà in disc TOP KIDS 14 cun sis aventuras da Pauli sco er in cudesch "Ina sorina per Pauli".

Cordiala gratulaziun e bler plaschair cun tadlar e guardar l'istorgia da Pauli.

 "Pauli", il nov gieu auditiv per uffants da Radiotelevisiun Svizra Rumantscha (RTR) e da la Lia Rumantscha (LR), cumpiglia sis aventuras da Pauli e tschintg chanzuns da primavaira che fan gust da tadlar.

Il medem mument cumpara tar la LR anc in cudesch da Pauli cun il titel "Ina sorina per Pauli". Sa chapescha cuntegna il disc TOP KIDS 14 era quella istorgia. Uschia pon ils uffants tadlar l’istorgia ed il medem mument guardar ils maletgs dal cudesch.

RTR e LR han realisà cun questa istorgia da l'autura austriaca Brigitte Weninger gia il 14avel disc communabel da la seria TOP KIDS. L’istorgia è adattada per uffants a partir da 3 onns. Empustar il DC pon ins tar RTR.

En il center da las istorgias stat il cunigliet Pauli. Ses geniturs e ses fragliuns han da far il tgil plain cun el. Ma Pauli emprenda ch’el sto mintgatant far dapli che mo dir “perstgisai!”. Ils uffants pon accumpagnar Pauli sin sias aventuras, nua ch’el scappa tranter auter davent da chasa, survegn ina sorina, festivescha ses anniversari, è malsaun u vegn a savair ch'el è per bleras chaussas gia memia grond u anc memia pitsch.