Minisguard dals 28-01-2012
Globalisaziun - bun u nausch?
Mintg'onn il schaner sa scuntran presidents da terras, manaders da firmas grondas ed intellectuals a Tavau durant il WEF. Per in'emna guarda l'entir mund sin il vitg alpin. Mintg'onn datti dentant era demonstraziuns encunter il WEF. Persunas che pretendan che la globalisaziun servi mo als pussants. È la globalisaziun pia insatge bun ubain insatge nausch?
Cudeschs da scola virtuals
Idiom ubain rumantsch grischun? Pli exact, en tge rumantsch duajan ils cudeschs da scola vegnir edids en il futur? Questa dumonda fatschenta mumentan fitg blers. Quest’emna ha ina firma da computers preschentà programs gratuits da stgaffir cudeschs da scola virtuals. Duajan cudeschs pia insumma betg pli vegnir squitschads en il futur? Nus faschain ina emprova.
Situaziun extrema per politichers ed economs
Quest’emna èn intginas da las pli impurtantas persunalitads da l’economia e da la politica a Tavau. Els èn a l’uschenumnà WEF, il Forum mundial d’economia. Quellas persunas s’entaupan per discutar davart problems dal mund, sco per exempel da la crisa da finanzas.
Tranter quellas persunas renumadas vegnan era da quellas da l’Asia, da l’Africa u dal Mexico. Persunas che n’han anc mai vis naiv e ch’èn il bler disads cun temperaturas agreablas, chaudas.
Tadlar la contribuziun da Manuela Morgenthaler...
Da la tabla da scola tar il „Smartboard“
En scola sa midan ils utensils adina puspè. Sch’ins dumonda cun tge ch’il tat e la tatta scrivevan, raquintani da griffels da granit. Ina tabla da crap stgir, sin quella sgriflavan ins ils bustabs. Ils geniturs avevan carnets da palpiri e las tablas che nus enconuschain anc oz. Dentant sa sviluppeschan ils meds da scola adina vinavant. Carnets, risplis, tablas, crida e projecturs vegnan plaunsieu remplazzads.