Tut ils sportists svizzers ch'èn a Vancouver han in pass. Uschiglio n'avessan els betg dastgà bandunar la Svizra. Dentant daco exact ston ins avair in pass? Il Minisguard declera daco e mussa l'istorgia dal pass. Mumentan blers che guardan mintga saira las cursas u las decisiuns dals gieus olimpics. Er il Minisguard mussa las medaglias e las impressiuns da quest'emna. Entant ch'ils ins èn anc a gieus olimpics d'enviern emprovan ils auters da stgatschar l'enviern cun las giaischlas.

Sch'ins vul far in viadi ord la Svizra en in'autra terra ston ins avair in pass. Quai è in cudischet, ed en quest cudischet èsi nudà differentas datas persunalas. Per exempel co ch'ins ha num, quant gronds ch'ins è, e plinavant chatt'ins en il pass era ina fotografia. Quai per ch'ins na possia betg cugliunar u duvrar il pass d'insatgi auter. A partir da quest onn cuntegna il pass svizzer era anc in chip cun si differentas datas persunalas. Mo danunder vegn il pass? E pertge dovran ins quel?

Ils gieus olimpics a Vancouver èn mumentan omnipreschent. Dapertut èn las cursas, las decisiuns e las medaglias olimpicas tema. Gronda euforia regia actual era en il Grischun. Quai cun raschun, il Grischun ha fin uss gia dus campiuns olimpics. Dario Cologna da Tschierv e Carlo Janka da Sursaissa. Il Minisguard lascha anc ina giada reviver ils pli bels muments e las impressiuns da quest'emna.

Il prim da mars è la festa da Chalandamarz. Propi festa è quai en l'Engiadina. Cun plumpas, stgellas e giaischlas duai l'enviern vegnir stgatschà. Il Minisguard ha visità in che fa giaischlas e declera las differentas parts d'ina giaischla. Ultra da quai mussa il Minisguard tgi che schluppegia meglier. Èsi ina mattatscha u in mattatsch?

Dapi duas emnas èsi uffizial. Il pli grond chaun dal mund è in doc che ha  num “Giant George”. U per rumantsch George gigantic. Sch’el stat sin duas chommas è el uschè grond sco in giugader da basket, numnadamain passa 2 meters. El paisa 111 kilos.