Las mattas siemian dad esser ina princessa, ils mats plitost d'esser in locomotivist. Omadus datti en quest Minisguard: Quai cun las nozzas da la princessa svedaisa Victoria e lura cun il nov tren «Allegra» da la Viafier retica che cursescha sur il Bernina.

Sper nozzas e trens moderns na vegn era ils sport betg a la curta. Per ils uffants da la Punt Chamues-ch è il di da l'arrivada dal Tour de Suisse en lur vitg stà insatge tut spezial.

E sa chapescha na dastga betg mancar, la contribuziun davart il campiunadi mundial da ballape.

Nozzas è per il pli insatge bel. Sch'ina princessa marida, lura è quai anc pli bel e pompus. Uschia era en Svezia. Là ha la princessa Victoria maridà. Nus avain intginas impressiuns.

Sin il traject dal Bernina charrescha ussa in nov tren. Quel ha il num Allegra. Il Minisguard ha fatg il viadi cun quest nov tren ed ha laschà declerar il locomotivist tge ch’è tut nov vi da quai tren. Ina da quellas novaziuns è che quai tren po charrar sin omaduas raits d’electricitad da la Viafier retica. Daco datti insumma duas raits d’electricitad e co funcziuna quellas? Il Minisguard ha las respostas.

Quest’emna è stada il Tour de Suisse. La cursa da velo che maina atras l’entira svizra. La gievgia è stada ina da las etappas las pli gravas. Quella ha manà da Meiringen en il chantun Berna sur ils pass dal Susten, Alpsur ed Alvra a La Punt Chamues-ch. Nus avain visità ils uffants da La Punt Chamues-ch e guardà tge ch’els han fatg qua di.

L'emna passada avais vus pudì giavischar ina contribuziun en connex cun il campiunadi da ballape. Vus avais gì la schelta tranter las suandantas propostas: ils chalzers da ballape, ils diamants da l'Africa dal Sid u ils exots al campiunadi. Giusut pudais guardar tge contribuziun ch'ils blers da vus han giavischà.