Il punct culminant per bleras sportistas e blers sportists stat avant isch, il Maraton da l'Engiadina. Gia per la 42avla giada ha lieu quest maraton. Var 12'000 passlungists sa participeschan. Il Minisguard mussa quanta energia ch'ins dovra per tegnair atras ils 42 kilometers dal maraton. Plinavant dumondan uffants il schef dal maraton daco ch'ins dastgia pir sa participar a partir da 16 onns.

La sensaziun è perfetga. Carlo Janka da Sursaissa ha gudagnà il classament general da la cuppa mundiala. Cun la victoria en l'ultim slalom gigant è il duel tranter Carlo Janka e ses concurrent Benjamin Raich stà decidì.

Carlo Janka da Sursaissa ha gudagnà il classament general da la cuppa mundiala. Uschia ha el gudagnà la culla gronda da cristal. Quai munta ch'el è il meglier skiunz da questa stagiun. Cun be 23 onns ha el ussa gia gudagnà tut. El ha gudagnà la culla gronda da cristal, el è campiun olimpic ed el è gia stà campiun mundial.

Il Maraton da l'Engiadina che va davent da Malögia fin a S-chanf è 42 kilometers. Per pudair tegnair atras quels 42 kilometers ston ins esser fit ed avair trenà. Uschiglio n'han ins nagina schanza. E per far in maraton da 42 kilometers dovran ins fitg bler energia. Quai savain nus tuts. Dentant quanta energia dovri propi per pudair tegnair atras in maraton? Il Minisguard ha fatg il quint. 

Ils fragliuns Luca e Luana Franziscus da Samedan, che han 13 e 12 onns, èn gronds fans dal passlung. I na dat bunamain nagut ch'els fan pli gugent che quest sport. Els faschessan era fitg gugent il Maraton da l'Engiadina. Dentant els èn memia giuvens per sa participar. Perquai han els dumandà Emil Tall, il schef dal maraton, daco ch'ins dastgia pir sa participar cun 16 onns.  

Cun il "Double McTwist 1260" gudogna il svizzer Iouri Podladtchikov, che ha 21 onns,  ils prims X-Games da l'Europa. El è pir il segund che ha insumma ina giada fatg quest sigl spectacular ad ina concurrenza.