Minisguard dals 11-02-2012
Tschaiver
Tar il tschaiver tutga era la musica da tschaiver. A Domat n'è quai betg simplamain ina musica da gugga. A Domat èn quai ils tamburs che dattan en il tun. Il Minisguard ha visità ils giuvens tamburs da Domat tar l'ultima prova avant il til da tschaiver.
Conflict en la Siria
En la Siria demonstrescha ina part dal pievel dapi emnas encunter la regenza. I ha gia dà millis morts e nagin fa insatge encunter la violenza da la regenza da la Siria envers l'agen pievel. Ma pertge na fa nagin insatge encunter? Il Minisguard declera.
Esser pauper ma cuntent
Ils pajais guardan oravant tut ch’i giaja bain cun l’economia. Damai guardan tuts d’adina survegnir dapli daners. I dat dentant excepziuns. Per exempel il Bhutan. In pajais ch’è pli u main uschè grond sco la Svizra ch’ha dentant mo enturn 700’000 abitants. Per il Bhutan n’è betg l’economia il pli impurtant, mabain la cuntentezza dals abitants.
Quai tuna bain, i dat dentant era varts negativas. Ils abitants dal Bhutan n’han betg blers daners. Els vivan fitg simpel. Il Bhutan è in dals pli paupers pajais dal mund. Quai betg l’ultim, perquai che l’economia na stat betg en il center. Televisiun datti en il Bhutan pir dapi 1999 e telefonins èn lubids pir davent da 2004. Malgrà tut quai conferma ina retschertga che 55% dals abitants èn cuntents cun lur qualitad da vita.
