Gia dapi in temp aud'ins adina puspè da la grippa da portgs. La grippa da portgs è sa derasada sin l'entir mund. Uschè ina malsogna che sa derasa sin l'entir mund numn'ins er ina pandemia. Ussa è ella arrivada tar nus, er en il Grischun datti pliras persunas cun la grippa da portgs. Dentant è la grippa da portgs uschè malsegira? Il Minisguard ha discurrì cun il medi Cla Rauch e nus declerain tge che la grippa da portgs è insumma e mussain co ins po sa proteger.  

Mesemna passada, ils 29 da fanadur han ins gì gronda fortuna a Raschvella en Engiadina Bassa. Là è vegnì giu in grip ed ha donnegià ina chasa ed ina stalla. Blessà n'è vegnì nagin. Il grip è sa distatgà sin la costa sur Raschvella ed è rudlà aval. Il mir d'ina chasa è sfratgà tras ed ina stgala è vegnida stgarpada davent. Il grip da 4 meters cubics che paisa 8 tonnas ha sfratgà er il funs da la stalla.

Il highlignt da l'emprim d'avust è per blers la festa da l'emprim d'avust cun las rachetas ed ils fieus artifizials. Quest onn han las butias fatg in bun affar. Tenor ils vendiders han ins pudì vender dapli ch'ils ultims onns, in motiv è segir stà la bell'aura. Ils Svizzers han cumprà per var 30 milliuns francs rachetas, vulcans ed autra rauba da l'emprim d'avust, quai è bunamain 50 francs per persuna.  

Adina l'emprim d'avust datti sin la plazza aviatica a Samedan ina show d'eroplans da model. Uschia èsi er stà quest onn e quai gia per la 20avla giada. Ina gronda raspada d'aspectaturs han pudì admirar ils models sgulond per l'aria enturn.

Er quest'emna ha il Minisguard fatg visita als pulschains. Uss èn ils pulschains gia 3 emnas vegls. E mumentan è lur occupaziun principala il currer, tuttadi  vegn currì.... si e giu e vi e nà - en in di fan els bleras cursas...