Laterna che fa sgarschur

Tar Halloween tutgan era las zitgas cun las grimassas. Quellas ch’ins sa metter oravant chasa e metter lien ina chandaila. Far ina tala laterna è simpel. Qua chattais in pitschen manual.

Sco emprim èsi da chattar ina bella zitga. Quella datti forsa tar la mamma en curtin u lura en butia. L’atun vegni vendi da tuttas sorts da zitgas.

TIP: grondas zitgas en bellas, ma magari va quai bler pli vess da tagliar ora quai, perquai che quellas èn bler pli diras.
E lura guardai gia en butia sch’ella stat bain si dretg. In po bain tagliar giu in zichel per ch’ella stettia grad, ma lura sto ins guardar da metter in taglier u insatge sumegliant.

Ussa èsi da chavar ora la zitga. Entamez ha quai cocs. Quels pon ins prender ora il pli simpel cun in tschadun da schuppa u lura sco quai ch’jau hai fatg, cun in tschadun da far ruclas da glatsch. Quels èn pli ferms.

Tut tenor quant grond che la zitga èsi era da chavar ora dapli che mo ils cocs. Uschia vai lura pli tgunsch da tagliar ora la grimassa e la chandaila glischa in zichel tras il mantè.

Ussa pos ti prender il maletg da la grimassa sco quel qua, tagliar ora e tatgar quel sin la zitga. Cun in culi san ins ussa malegiar suenter las conturas. Igl è da smatgar pulit ferm ed ir intginas giadas surora per ch’ins vesi las conturas.

Sch’ins vesa mo pauc ellas, lura san ins era malegiar suenter quellas cun il culi direct sin la zitga. Uschia ves’ins lura meglier nua ch’igl è da tagliar.

Cun in cuntè pitschen da piz èsi ussa da tagliar ora la grimassa. Magari vai meglier da tagliar igl emprim mo in zichel e lura adina in zichel pli profund fin ch’ins è tras il mantè.