Annina

Annina ha chavels cotschens sco froslas. Ella abitescha oradim vischnanca en la chasetta cun ses tat. Il tat è vegl.

La chombra d’Annina è si sut il tetg. Davant fanestra tschivlan ils utschels. Ils splers ninan en il vent.

Il tat lavura savens en uigl. El guarda da las nursas. Carli, il tschut, ed Anina èn camarats. “Tschuts n’èn betg termagls”, di il tat. Annina è trista.

I va vers Nadal. La naiv cuvra ils tetgs da las chasas. Mintga damaun van las dunnas cun chandailas tras vischnanca. Be Annina stat a chasa. Ella n’ha nagins guants.

L’autra damaun sa schluita Annina tuttina or da chasa. Il tat dorma anc. Ella suonda las glischs fin en baselgia. Las dunnas van a messa. 

En baselgia èsi bel chaud. La calustra metta si la stalletta da Nadal, Maria, Gisep ed il Bambin.

La calustra va a chasa. Annina è stancla. Ella sa ruschna sut il mantè da Gisep. Il Bambin la tegna per il maun. Annina sa durmenta.

Il tat sa dasda. Il letg d’Annina è vid. Il tat prenda sia channa e va a tschertgar Annina. Carli, il tschut, al curra suenter. Annina è svanida.

Il tat va en baselgia per far uraziun. El vesa Annina sut il mantè da Gisep. Annina sa dasda. Il tat ri: “Carli tutga ussa a tai. Sia launa dat chaud.”

Da Nadal raquinta il tat l’istorgia dal Bambin. Annina sesa stretg dasper il tat. Ella tegna il tschut Carli. Annina è cuntenta.