Has buca mumma pli
Sun sin finiastra tut persuls
e mirel or’el stgir,
cheu vesel jeu vi tiel vischin
aunc ina glisch sclarir.
Leu sper la tgin’en oraziun
ves’jeu la mumma star,
agl affonet sin frunt e pèz
la sontga crusch a far.
Igl aunghel porscha siu maunet
per dar carin cumiau,
la mumma spert aunc dat in betsch
e lu vegn tut stizzau.
Leu sin santeri va miu egl,
la crusch enquer’el si,
"O sventirau", rebatt’il cor:
"Has buca mumma pli."
(il polischet, canzuns romontschas per l’instrucziun da clavazin tschentadas da Rica-Maria Cathomen 1995, text Gion Cadieli, melodia Otto Camenisch)