"Ha, ha! Jau hai surpassà a tai!" "Ti mo spetga, jau mangel si a tai!" En il gieu sa mussa savens il caracter da mintgin da nus. Ils ins pli agressivs, ils auters forsa pli miaivels. Tgi dat tge gieu co? Tge funcziun han gieus per la psica da l'uman? Il psicolog da gieus Christian Roth dat scleriment.

"Troccas datti mo tar nus!" Quella ed autras vardads mesas vegnan intercuridas d'Ulrich Schädler, archeolog e directur dal museum da gieus svizzer. E tgi avess patratgà che „tgi che va plaun va saun" - il gieu da cumpagnia sper il jass, il pli svizzer, deriva ord l'India? 

Schah è il gieu da guerra classic. Spiert cunter spiert enstagl da arma cunter arma. Il gieu d'umens pensivs, ruassaivels. Warhammer è il gieu da guerra da la moda. Armadas dad „Orks" cunter armadas da „Space Rangers". In gieu canerus. In gieu charnus. Giugà da giuvens cun gronda affecziun, gronda premura (ins sto bajegiar e colurar sez tut las figuras) e gronda bursa (custs per in'armada sco tutga: minimum 800.--). Cun Guido Caduff dal club da schah da Flem-Laax e Gion Mathias Cavelty, scribent e noviz en Warhammer.