Cupitgarolas per viver pli sanadaivel

Co es ti ì oz a bun’ura a scola? A pè u ha la mamma ni il bab mess tai avant scola cun l’auto? Con fit ès ti? Quai dumonda ina campagna da “Grischun moviment” mintga abitant dal Grischun cun il slogan “Es ti fit?”

Quella campagna lantschada quest’emna vul animar uffants, ma era creschids da sa muventar dapli e magliar pli sanadaivel. Il meglier emprendan ins quai da pitschen ensi. Perquai datti ina acziun en las scolettas cun il num “cupitgarolas”. La scoletta da Trun sa participescha era a quella acziun che dai promover il sa muventar ed il viver pli sanadaivel. Nus avain visità la scoletta e guardà co quai funcziuna.