Di da las figlias - era RTR ha survegnì visitas

Per la 9avla giada datti il di da las figlias en Svizra. Igl è in project dals posts d’egualitad da differents chantuns e da l’Uffizi federal da furmaziun professiunala e da tecnologia. La finamira da quai di è da sensibilisar las mattas per la gronda paletta da mastergns e da mussar quant impurtant ch’in mastergn è per lur futur. La gronda part da las figlias che van en la 5 fin 7avla classa accumpognan lur babs u lur mammas a la lavur. Autras emprendan d’enconuscher en in project la lavur da tecnicistas e informaticras. Era tar Radio e Televisiun Rumantscha (RTR) han babs e mammas prendì lur figlias a lavurar oz. Nus avain visità ellas al plaz da lavur da lur mamma u da lur bab.