Stgaudar l'aua cun la forza dal sulegl
Collecturs da solar ves'ins adina pli savens sin tetgs e paraids da chasas. Quels na produceschan betg tuts electricitad. I dat era blers che stgaudan l'aua chauda ch'i dovra en chasa. Co funcziuna quai dentant?
Per ch'ins possia stgaudar l'aua cun la forza dal sulegl dovri sco emprim in collectur solar. Quels vegnan per il pli plazzads sin tetg. Per ch'i possia dentant stgaudar bain l'aua ston ils collecturs dentant esser sin in tetg che ha uschè bler sulegl sco pussaivel.
Il sulegl stgauda
La glisch dal sulegl para d'esser alva. Igl è dentant uschia ch'ils radis dal sulegl cuntegnan tut las colurs da l'artg. Sper quellas colurs trametta il sulegl era anc radis da colurs che nus na vesain betg. Igl è ils radis ultraviolets (UV) che fa che nus survegnin arsentadas dal sulegl ed ils radis infracotschens che nus sentin sco chalur.
Cuntanschan ils radis da sulegl insatge ch'è alv, lura vegnan ils radis puspè reflectads enavos. Tar objects ch'èn stgirs è quai il cuntrari. Ils radis vegnan absorbads u traguttids e mo paucs vegnan reflectads. Ils radis absorbads fan che pitschnas parts, ch'ins gnanc vesa, sa muventan. Pli blers radis che vegnan absorbads e pli svelt che quellas pitschnas parts sa muventan. Quai munta era che l'object daventa pli chaud. Forsa avais era gia fatg persenn; sche vus avais tratg en in pullover nair e stais cun quel en il sulegl, lura vegn la taila dal pullover fitg chauda.
Il collectur solar
Gist quest fenomen tira il collectur solar a niz. Sco emprim vegn in vaider, quel lascha ir a tras ils radis dal sulegl na lascha dentant betg ir anora il chaud.
Il cor dal collectur solar è l'uschènumnà absorbader. Sco il num di absorbescha quel ils radis dal sulegl e daventa uschia era chaud. Per che quai funcziuni è sto quai absorbader pia esser nair. Il rom e la part suten dal collectur solar èn isoladas, uschia che la chalira na va betg a perder.
En l'absorbader u gist sut quel èn bischens. Atras quels circulescha aua. Cun circular atras quels bischens vegn quella stgaudada. Quell'aua n'è per il pli betg l'aua che vegn la finala ord la spina. Quest'aua ha mo la funcziun da transportar il chaud dal tetg en tschaler en in tanc d'aua. Ils bischens che mainan en tschaler èn isolads fitg bain, per che nagina chalira giaja a perder. Pertge l'aua cuntanscha temperaturas da 60 fin 80 grads.
En tschaler vegn stgaudà l'aua
La chalira vegn surdada cun in stgamiader da chalur a l'aua che sa chatta en in tanc en tschaler. Quai stgamiader da chalur è nagut auter ch'il bischen che vegn giu dal tetg che va atras l'aua en il tanc. Cun quai vegn la chalira surdada a l'aua en il tanc. L'aua en il tanc è lura l'aua che vegn or da la spina. L'aua en il bischen daventa puspè pli fraida e circulescha puspè enavos sin tetg. Quai succeda in cuntin uschia che l'aua vegn adina stgaudada sin il tetg e surdat quella a l'aua en il tanc.
Tge è ina chasa da minergia e tge è auter tar questas chasas? Quai pudais guardar en il Minisguard dals 01-05-2010...