Las aventuras da Fiutsch & Calli
Fiutsch è in pitschen robot or da tocca veglia ed il meglier cumpogn da Calli. Fiutsch e Calli navigheschan cun l'astronav Skaischattel tras l'univers e durant lur viadis vegnan els adina puspè en situaziuns privlusas. En mintga episoda pudais uss tadlar ina da las numerusas aventuras da Fiutsch & Calli.
Episoda 16 - Igl egl pli grond ch’il begl
Has era gia mangià dapli che quai che ti avessas insumma pudì e silsuenter sa sentì mal? Il robot Fiutsch, il meglier ami da Calli, lez sto patir perquai ch’el ha maglià e bavì bler da memia ed anc da quai ch’el na dueva betg. El ha mal il venter ed ha in chau tut sturn. Sco bleras giadas sto Calli puspè ina giada gidar Fiutsch or da la miseria.
Episoda 15 - Las vacanzas
Insacura daventi lungurus per Fiutsch eCalli da mo guardar sin las medemas paraids da l’astronav Skaischattel. Perquai vulan fan els ina excursiun sin il planet Marini. Mo quell’excursiun – ubain quellas vacanzas sin quai planet daventan in pau stentusas per noss astromarins. Els han da cumbatter cun blers problems.
Episoda 14 - Ils paslers
Ramurs, las qualas ch’ins na po betg definir danunder ch’ellas vegnan, n’èn main empernaivlas. Era Fiutsch e Calli èn irritads pervia da ramurs nunenconuschentas en lur astronav lunsch viadora en l’univers. Perquai sa mettan els sin la tschertga.
Episoda 14 - Rosina
Il robot da Calli è construì ord tocca veglia e na funcziunescha betg adina. Perquai duai Cali survegnir in nov robot. La premissa è dentant che Calli bitta davent ses robot Fiutsch en il fier vegl. Sche Calli bitta vairamain ses robot u betg, pos ti tadlar en quest’episoda da Fiutsch e Calli.
Episoda 13 - Ruschmentign
Fiutsch n’è betg ils sulet robot en l’astronav. Tranter auter datti er in robot che schubregia - il Ruschmentign. Magari quel schubregia magari memia bain e gliez n’è lura betg uschè bun.
Episoda 12 - Il bal
Mintga gia che l’astronav sgola tras ina rusna naira, datti in bal en la sala dals planets da la Skaischattel. Uschia era en quest’aventura. Calli dastga era sa participar al bal. Mo ella n’ha nagina rassa ed è nagin camarat per ir al bal. En la Skaischattel datti dentant schliaziuns per mintga problem.
Episoda 11 - La rapinada
Calli è sin la tschertga da Fiutsch. Mo quel n’è betg da chattar. Fiutsch è sparì e bain spert vegn Calli sin l’idea che Fiutsch saja vegnì rapinà. Mo tgi pomai rapinescha fiutsch? La resposta datti sche ti taidlas la proxima aventura da Fiutsch e Calli.
Episoda 10 - Poutschti
Lungurus vegni mai sin l’astronav Skaischattel. Quella giada èn in dals robots malsauns. Era quai capita magari. E sch’igl è lura anc gist il robot Pouschti ch’avess da reparter ils pachets en l’astronav lura datti er nagina posta. Mo il capitani Nemo ha ina schliaziun...
Episoda 09 - La turta da Marry
Il Capitani da l’astronav Skaischattel ha oz anniversari. E sch’ins na po betg vegnir giu sin il mund e bandunar l’astronav lura èsi almain da far festa en l'astronav e mangiar in bun toc turta. La festa n'è dentant stada a fin pli spert che quai ch'era quintà e tar tut quai è era anc l'astronav en grond privel.
Episoda 08 - L'arsentada
Firads n’è betg mo ina flotta chaussa tar nus sin il mund. Firads han era ils astromarins da la Skaischattel gugent. Era els han liber quels dis. Sin la Skaischattel datti mintgamai in firà, cura che la l’astronav è fitg manaivel al sulegl. Lura èsi mintgamai fitg chaud sin l’astronav. Per Fiutsch èsi dentant stà questa giada in pau memia chaud.
Episoda 07 - La cursa cun Murillo
Er robots èn magari schiglius. Sche ti na crais betg quai, lura taidla questa aventura da Fiutsch e Calli. Fiutsch è numnadamain schiglius sin Murillo in ami da Calli. E perquai gida el Calli tar la cursa tras il suler grond da l’astronav.
Episoda 6 - Ovs sgulants
Fiutsch e Calli ston per ina giada bandunar l’astronav per vegnir giu sin il planet blau – sin il mund. La raschun è che Calli e Fiutsch ston tschertgar insatge ch’i han pers. E tge ha quai tut ussa da far cun ovs sgulants? As dumandais vus segir. Qua na tradin nus betg. Taidla l'istorgia.
Episoda 5 - Il monitur engurd
Fiutsch e Calli n’han betg buna luna. Oz ston els far urden en in magazin da tecnica da l’astronav e quai n’è betg gist l’occupaziun preferida da noss dus erox. Mo il robot Fiutsch ha gì in’idea co schliar il problem.
Episoda 4 - Ils Delta-Boerdis
Expediziuns en il spazi èn magari privlus. Oz è l’entira astronav Skaischattel èn privel e sto chattar ina schliaziun per ch'i na dettia betg ina catastrofa. Fiutsch, sco Calli numna ses robot, ha dentant ina schliaziun e salva uschia l’astronav e l’entira equipa.
Episoda 3 - La flur latgerita
Quella giada han ils astromarins da tschertgar ina flur, ina flur ch'i dat mo sin il planet Orion. I sa tracta da la flur latgerita, quella duai sco i para dar latg. E perquai han ils astromarins da far in’expediziun sin Orion per tschertgar la flur.
Episoda 2 - tschaiver
Betg mo sin terra è tschaiver, era sin l'astronav Skaischattel han ils astromarins gust da sa mascrar e da far barlot. Ina bagorda dentna fa memia da rubiesti e metta l'astronav en grond privel.
Episoda 1 - il schel miraculus
Oz ha Calli da gentar ensemen cun ses bab, il capitani da l’astronav. Per quella occasiun vul Calli vesair or bain, be ses chavels na vulan betg propi far ina parita. Fiutsch, il robot da Calli, ha in’idea per schliar quai problem.
